Ermənistan təsdiqlədi: Aİ-yə üz tutur - Sülh sazişi ilə bağlı çaşqınlıq yaradan açıqlama

Ermənistan parlamentinin Avropaya inteqrasiya komitəsi respublikanın Avropa İttifaqına daxil olması prosesinin başlanması haqqında qanun layihəsini ikinci oxunuşda təsdiqləyib.
Avropaya inteqrasiya haqqında qanun layihəsinin daxil edilməsi barədə qərar səs çoxluğu ilə qəbul edilib.

Komitənin sədri Arman Eqoyanın iclasda bildirdiyi kimi, qanun layihəsinin preambulasından “Ermənistan xalqının vahid iradəsini ifadə edən” (Avropa İttifaqına daxil olmaq istəyi haqqında) ifadəsi çıxarılacaq. Qəbul prosesinin məqsədlərinin demokratik təsisatların, qanunun aliliyinin və ölkənin təhlükəsizliyinin gücləndirilməsi olduğu bildirilir.

"Komissiya layihəni parlamentin sabah başlayacaq iclasının gündəliyinə çıxaracaq", - deyə sədr bildirib.

Eyni zamanda müxalifətdəki “Hayastan” fraksiyasından olan deputat Armen Gevorqyan xarici işlər nazirinin müavini Paruyr Hovhannisyana Aİ-dən bu layihəyə rəsmi reaksiya olub-olmadığını soruşub. Hovhannisyan qeyd edib ki, Brüssel qanunun ikinci oxunuşda qəbul olunmasını gözləyir və bundan sonra reaksiya gözləmək olar.

"Aİ-nin iş üslubunu bildiyimə görə, onlar heç vaxt ikinci və ya üçüncü oxunuşu gözləmirlər. Siyasi qərar olarsa, ona ya müsbət reaksiya verirlər, ya da heç reaksiya vermirlər", - Gevorkyan cavab verib.

O, həmçinin Avropa İttifaqının müdafiə təşkilatı olmadığına və NATO çərçivəsində Aİ ölkələrinin təhlükəsizlik məsələləri müzakirə olunduğuna görə təhlükəsizliyin gücləndirilməsi üçün hansı tədbirlərin görüləcəyini soruşub. O əlavə edib ki, qanun layihəsində “təhlükəsizliyin gücləndirilməsi” dedikdə nəyin nəzərdə tutulduğu göstərilməyib.

Bununla bağlı qanun layihəsinin hazırlanması təşəbbüsünün üzvü Artak Zeynalyan bəyan edib ki, Aİ-nin təhlükəsizlik arxitekturasına təkcə Silahlı Qüvvələri deyil, həm də “iqtisadiyyat və demokratiya” daxildir və Ermənistan “Aİ-yə daxil olarsa, bu təhlükəsizlik sisteminin çətiri altına girəcək”.

Hovhannisyan qeyd edib ki, bu günə kimi Ermənistan və Aİ nümayəndələri xarici siyasət və təhlükəsizlik məsələləri ilə bağlı iki müzakirə aparıblar və bu məsələlərin daha fəal müzakirə olunması qərara alınıb. O əlavə edib ki, Ermənistan təhlükəsizlik məsələləri üzrə texniki dəstək verən Avropa Sülh Mexanizmi proqramında iştirak üçün ikinci ərizə verib. O, həmçinin xatırladıb ki, qarşılıqlı razılaşma əsasında Azərbaycanla sərhəddə avropalı müşahidəçilər missiyası ölkədə mövcudluğunu 5 il uzadacaq. Gevorkyan bunun çaşqınlıq yaratdığını ifadə edərək qeyd edib ki, Azərbaycanla sülh sazişində iki ölkənin sərhədində üçüncü qüvvələrin olmayacağı və bunun avropalı müşahidəçilərə də aid olduğu qeyd edilib.