Dünya yeni və COVID-19-dan daha təhlükəli xəstəliyin pandemiyası ilə üz-üzədir. Bu, hər an, elə günü sabah baş verə bilər.
Bunu Ümumdünya Səhiyyə Təşkilatının (ÜST) baş direktoru Tedros Adhanom Qebreyesus təşkilata üzv dövlətlərin səfirlərinin qarşısında etdiyi çıxışda deyib.
Bildirilir ki, Qebreyesus ölkələri pandemiyanın qarşısını almaq üçün razılaşma üzərində işi gücləndirməyə çağırıb. O, Ümumdünya Səhiyyə Təşkilatının pandemiya sazişi üzərində işi finiş xəttinə çatdırmağın vacibliyini vurğulayıb.
Xatırladaq ki, 2021-ci ildə pandemiya ilə bağlı beynəlxalq sazişin hazırlanması üçün danışıqlar orqanı yaradılıb. Ötən il may ayının sonunda növbəti Ümumdünya Səhiyyə Assambleyasında onun səlahiyyətləri uzadılıb. Növbəti assambleya bu ilin may ayında baş tutacaq və burada pandemiya sazişinin nəticələrinə yekun vurulacağı gözlənilir.
