Rusiya Donald Trampla danışıqlara Ukrayna münaqişəsi ilə bağlı olmayan ayrıca diplomatik xətt kimi baxır.
Publika.az “The New York Times”a istinadən xəbər verir ki, bunu yüksək rütbəli rus diplomatları deyib.
Rusiya Dövlət Dumasının Beynəlxalq Əlaqələr Komitəsinin sədr müavini Leonid Nikonov qeyd edib ki, Tramp və Putin arasında danışıqlar Ukrayna ilə bağlı məsələləri özündə əks etdirməyən “ikitərəfli gündəm”in hazırlanmasına yönəlib. Onun sözlərinə görə, ABŞ-la münasibətlər Putin üçün Ukrayna məsələsindən daha vacibdir.
Rusiyalı beynəlxalq əlaqələr üzrə ekspert Aleksandr Dınkin vurğulayıb ki, Rusiya üçün Amerika təyyarələrinin ehtiyat hissələrinin ixracı və Moskvaya birbaşa uçuşların bərpası üçün ABŞ-dan icazə almaq xüsusilə vacibdir.
Rusiya da öz növbəsində Amerika aviaşirkətlərinə 2022-ci ildən bəri mümkün olmayan Sibir üzərində hava məkanından istifadə etməyə icazə verməyə hazırdır. ABŞ-ın “dost olmayan ölkələr” siyahısından çıxarılması ehtimalı da nəzərdən keçirilir ki, bu da Amerika şirkətləri üçün Rusiya bazarına çıxışı açacaq.
Ukrayna münaqişəsinə gəlincə, Rusiya BMT-nin sülhməramlı qüvvələrinin Ukraynaya daxil olmasına NATO ölkələrinin qoşunlarını daxil etməmək şərti ilə razılaşa bilər.
Dünya İqtisadiyyatı və Beynəlxalq Münasibətlər İnstitutunun direktoru Fyodor Voitolovskinin fikrincə, Rusiya üçün qısamüddətli atəşkəsdən daha çox uzunmüddətli perspektivlər vacibdir.
Ukraynaya gəlincə, analitiklərin fikrincə, Vladimir Putin əsas məqsədlərindən imtina etmək əlaməti göstərmir. Kreml danışıqlar prosesini ləngitsə belə, Trampın Ukraynada sülh razılaşması əldə etmək cəhdindən mümkün qədər çox fayda götürməkdə qərarlı olması müşahidə olunur. Moskva üçün Vaşinqtonla münasibətlərin yaxşılaşdırılması həm iqtisadi, həm də geosiyasi baxımdan vacibdir.
